Зурагчин: Б.Рэнцэндорж
Нээлт: 2015 оны 6-р сарын 10-ны 12:00 цаг
Байршил: Улаан Гэр галерей
Зохион байгуулагч: Баримтат гэрэл зургийн Ц.Батзориг сан, Гёте институт
Дэмжигч: Соросын сан
Ивээн тэтгэгч: Монголын Урлагийн зөвлөл, Улаан Гэр галерей
Гэрэл зургийн сурвалжлагч Б.Рэнцэндоржийн “Нарантуул” бие даасан үзэсгэлэн 2015 оны 6-р сарын 10-нд Улаан Гэр галерейд нээгдэж, арван хоногийн турш олон нийтэд дэлгэгдсэн юм.
Гэрэл зурагчин Б.Рэнцэндорж 2010 оноос хойш “Нарантуул” захын орчин, худалдаачдын амьдралын дүр төрхийг авч эхэлсэн бөгөөд худалдаачдын хөрөг, өдөр тутмын амьдрал, орчин нөхцөлийг бүтээлдээ багтаасан байна.
Үзэсгэлэнд гутлын худалдаачин Т.Оюунчимэг, малгайны бизнес эрхлэгч Т.Түмэн-Учрал, модон эдлэлийн үйлдвэрлэгч О.Цэнгэл зэрэг худалдаачдын хөрөг, өдөр тутмын ахуй байдлыг харуулсан гэрэл зургууд багтжээ.
Б.Рэнцэндорж энэхүү төслөөрөө 2013 онд Соросын сангийн “Төв Азийн баримтат гэрэл зургийг дэмжих хөтөлбөр”-т шалгарч, Туркийн Станбул хотноо мэргэжлийн сургалтад хамрагдсан.
Тэрээр олон улсын зурагчидтай хамтран ажиллаж, бүтээлээ шүүмжлүүлж сайжруулах талаар туршлага солилцсон бөгөөд Монголд буцаж ирсний дараа зургаан сарын хугацаанд “Нарантуул” зах болон БНХАУ руу худалдаа эрхлэн явж буй тухай зураг авалт хийж төслөө үргэлжлүүлсэн юм.
Төслийн үр дүн болон цуврал гэрэл зургийн ойлголтыг нэмэгдүүлэх, олон нийтэд баримтат гэрэл зургийн үнэ цэнийг ойлгуулах зорилгоор Ц.Батзориг сан үзэсгэлэнг хамтран зохион байгуулж, зурагчны бүтээлийг олон нийтэд хүргэсэн болно.